Каков белег оставивме?

 

 

Почитувани,

 Локалните избори кои што сеуште се во тек не се ниту фер, ниту слободни, ниту демократски.

Ненавлегувајќи во набројување на неправилности доволни се случувањата во ДИК каде што низ директен телевизиски пренос сите граѓани се уверија во неискреноста на власта.

Очекуваме сличната фарса да продолжи и деновиве во Управниот суд.

Во ВМРО-Народна партија сме многу сериозно загрижени и вчудоневидени од масовноста и леснотијата на купување на гласови на овие локални избори. Слушајќи ги коментарите на граѓаните, човек ќе помисли дека ваквиот начин е легализиран со позитивните законски прописи а не казниво дело како што предвидува законот.

Во секоја демократска држава доделувањето на субвенции, симболични покачувања на плати и социјални додатоци, простување на долгови, вработувања и други бенефиции од државата, доколку терминолошки би се поклопувале со време на кампања, се одложуваат за да не влијаат на изборниот процес.

Купувањето на гласови во последните 48 часа од изборниот процес беше толку масовно и отворено што обичните граѓани не можеа да ја разберат гордоста на оној што купил или пак среќата на оној што го продал својот глас.

Бидејќи ова не се нивни пари туку пари на сите граѓани на Република Македонија, висината на цената за поединечно или фамилијарно гласање не беше проблем, колку и да се побараше се плаќаше.

Сознанијата од тоа кај граѓаните се следните: Власта која цел месец и повеќе не бомбардираше секојдневно на нивните медиуми со фалби за поранешните свои успеси, и со понудата на 10 112 нови проекти, очигледно е дека и самата не верувала во ефектите на сопствената пропаганда па затоа свесно се одлучи да примени ваква форма на обезбедување на победа.

Од друга страна се потврди дека голем дел од граѓаните не веруваат во сите нејзини пропаганди и ветувања туку до даваат својот глас за она што им е најсигурно. Примање поткуп.

Новата локална власт со купувањето на гласови на некој начин се амнестира од обврската за реализирање на предизборните ветувања затоа што верноста на најголемиот дел од  гласачите е платена.

Од друга страна и граѓаните кој го продале својот глас немаат образ да бараат исполнување на предизборните ветувања како личните така и општествените.

Сега е последната шанса граѓаните да се спротистават на ваквите процеси во Македонија додека не добиле општествена униформа затоа што после ова, нормалното демократско однесување ке се прогласува за Ерес.

На крај, ВМРО-Народна партија ги поздравува и им честита на сите чесни граѓани кои гласале по сопствено убедување за било која партија и успеале да го сочуваат својот образ и достоинство.

Од друга страна, овие другите гореспоменатите, кои беа среќни само еден ден дружејки се со власта со поднадуени стомаци и замастени чела ке продолжат да бидат најголеми плачковци до некои наредни избори… За нив коментар нема ништо. Таквите толку заслужуваат.

Со почит

ВМРО-Народна партија

---