За директорот на Државен архив револуционерите се Бугари, што се за Владата?

mk}vmron

ВМРО-Народна партија со голема зачуденост и неверување ја слушна изјавата на г-нот Зоран Тодоровски, директор на државниот архив на Република Македонија во која јасно и недвосмислено на новинарско прашање во врска со  содржината на книгата чиј автор е самиот тој одговори. Сите преродбеници, културни дејци, интелектуалци и револуционери од 19 век и почетокот на 20 век, без оглед на нивната десна или лева ориентација јавно искажувале недвосмислено чувство и припадност кон бугарската нација.

Дополнителна тежина на ова јавно признание на господинот Зоран Тодоровски е и фактот што е тој директор на државниот архив на Република Македонија која е една од најзначајните владини институции. На сите ни е познато дека државните архиви во светот се нарекуваат храмови на вистината затоа што предмет на нивно чување, обработка и по потреба презентирање се исклучиво оригинални документи и материјали кои се од витален интерес за државата.

ВМРО-Народна партија прашува: Дали ваквиот шокантен пресврт е личен став на господинот Зоран Тодоровски или има и други истомисленици по ова прашање од историчарите, научните работници и академиците? Каква е реакцијата на плеадата млади историчари кои во последниве неколку години постојано ја бомбардираа македонската јавност за античкиот карактер на македонците? Дали постои јасна поделба и разединетост меѓу научните работници во толкување на ова многу чувствително прашање?

Веруваме дека доколку продолжи ваквата нерасчистена ситуација ќе предизвика дополнителна дезориентација кај македонските граѓани.

ВМРО-Народна партија бара од Владата на Република Македонија да завземе единствен став и истиот јавно да го презентира. Се наоѓаме во мошне чувствителен период каде што идентитетот како услов невнимателно сами си го наметнавме во решавање на спорот со името, без никој од нас тоа да го побара. Затоа сме убедени дека една брза реакција на Владата ќе допринесе за напредок на процесот за нашите евро-атлантски интеграции.

Со почит,

Центар за комуникации

на ВМРО-Народна партија